Marzo

Hallo,
ja ich has gmerkt, mini blog-iiträg werded immer seltener... JEtz hemmer denn i einere wuche ferie, freu mi zimli...=) Letscht wuchenend bini z castellon xi mit andere uustuuschschüeler, as konzert vomne afs-freiwillige. Isch no luschtig xi... hehe. Susch passiert nöd so vil, morn gani mit de pili und de laura in uusgang, und hüt mit de pili und irere cousine go en welpe hole für iri tante. Jöö=)
Ja sorry, isch leider lächerlich churz de iitrag, aber ich mus wider ga. Besos!
ps: bitte kei brief und päckli meh schicke im moment, s git grad es paar problem. Freu mi über email=)

Crêpes und mis suschtige lebe...

Jaja, wider mal en iitrag demit ier ali wüssed dases mir guet gat. Hüt hemmer im franz crêpes gmacht, was mich und d pili (mini nachberin) inspiriert het, und drum gani morn zu ire go crêpes mache *froi*. Letschte samstig bini mit ire, de laura (au mini nachberin) und ere cousine vode pili in uusgang, was zimli lustig gsi isch. Da gat mer immer zersch zäme go esse, nacher go alk chaufe (jaja, öpis sehr fundamentals, obwohl ichs recht gruusig find mit 15 lüüt vonere fläsche ztrinke, aso machis lieber nöd) und nacher zumne kolleg wo en "parador" het, das heisst so öpis schopf-ähnlichs wo di jugendliche drin party mached... so öppe. Fasch ali kened öper wo das het. Und wen mer niemer kennt, isch mer uncool.
Den bini mit de Pili (=pilar) zu irere tante go schlafe, wo u lieb isch und mir di ganz telenovela erchlärt het wo grad gloffe isch. De pili iri familie isch u nett und zwinged mich immer, dopplet so vil z esse wi ich eigentlich möcht. Aber ich beklag mich ja nöd ^^. Mit de familie laufts ok, mini gastschwöschter wo 20 isch und bis jetzt studiert het isch wider hei züglet, ich üssere mini meinig dezue jetz nöd. Also, ich sött is gimnasio. Tünd schön kommentär schriibe!
ps ier hend ja ferie ide schwiiz... *niid* Schöni ferie a ali!

Mis spannende lebe

Ich ha grad chli i diverse blog umeglese, und ha gmerkt das mini iiträg weder zu amüsant sind no aastädig lang (ja julia, du hesch mis ego zerstört mit dim sydney-iitrag) aber ich cha ja nüt defür wen mis lebe da hauptsächlich um schuel, esse, fernseh und schlafe gat!
Aber ich wird trotzdem versueche, mal chli z verzelle was da so passiert.
Ich ha jetz mit valenciano-kurs aagfange, wobii ich ja jetz weiss das valenciano catalán isch, obwohl das 70% vo allne valencianer bestriited. Mer haltet sich da druus, hani glernt. Uf jedefall hanis chli schwer wel de kurs sit em november lauft und si jetz aafanged mit vergangeheite, und ich cha no nüüt! Ich verstah zwar zimli ales und repetier halt sätz woni 10 mal am tag ghöre, aber vo grammatik tscheggi nüt. Aber ich fänds scho recht cool zruggzcho und valenciano zrede.
Denn het sich de spiess chli gkehrt mit de kollege, vorher hani mi immer selber müse iilade und umestresse bisi mal endli usem huus ha chöne, und di letscht wuche bini jede tag nach de schuel bis zum znacht vo huus zu huus gstresst zum mini homies treffe. Mini Gasteltere hend froid, si hend eh s gfühl das wen mer vorem morge am 3 heichunt het mer kei kollege und isch en Loser. Ich gnüsses, weni den wider ide CH bin gits wider regle;).
De Samstig bini mit mine AFS-lüüt z Elche xi, e wunderschöni stadt z alicante mit extrem vil palme. Mir hends immer voll lustig zäme (gäll nöri^^) und ich froi mi scho uf di nächst reunion im februar.
Am mittwuch (aso morn... hui, ich ha ja morn physikprüefig!) wird mini gastmueter am hals operiert, das heisst d stimmig da dihei isch ener aagspannt. Mini Gastmueter verarbeitet iri nerviosität indem si putzt, das heisst es schmöckt recht starch nach cillit bang, und us de chuchi chunt ab und zue en hilferuef ad mueter gottes. D mueter gottes isch eh zimli beliebt da. Ich han übrigens en rosechranz übercho vo mim gastgrossmami, wel si usegfunde het das ich nöd tauft bin, si het gfunde vilicht halti er de tüüfel vo mir fern.
Das Wuchenend gang ich uf Castellón bi de Teresa (e spanischi fründin) go übernachte. Froi mi scho!
Nächst wuche passiert glaub nöd vil, den chani mi wider chli em gimnasio widme. Ich ha erstuunlicherwiis nach de 12tägige wienachtsfresserei ken überdimensionale bierbuuch übercho wo walter heisst. Irgendwie schad, ich ha mir scho uusgmalt gha winich em walter valencia zeig. Okay, mer merkt dasich da chli z wenig schlafe und drum komisch wird. Wi joghurt wenmers nöd in chüelschrank tuet!
Also, ich glaub de iitrag isch gnueg lang dasi mich nüm inadäquat fühle (isch das es wort?). Schöns tägli no!

Semana Blanca

Liebi lüüt wo min blog lesed wens mal nüt bessers ztue hend,
ich bi gester vode schiwuche heicho. D Schiwuche isch zimli lustig xi, en chliine 12jährige het sich de oberschenkelchnoche broche und het müse mitem heli uf barcelona iigfloge werde, 4 hend sich öpis verstuucht, de eint het d wuche miteme vergipsete fuess ide Cafeteria verbracht (er hets aber verdient, er het dusse umegspoizt und isch den uf sim spuder, wo underdesse gfrore isch uusgschlipft.. ok, so gats grücht ) und eini het e reizendi halskrause übercho. Ich glaub vo dene 30 wo gange sind isch ungefähr d helfti heil zruggcho.
Jetz musi denn wider id schuel... Tja.
A ali wo no uf turrón, etc. wartet: Es chunt! Ich ha oi nöd vergesse!
Merci für all die brief woni übercho han, ich schriib sicher bald zrugg!
<3 malin

Feliç Any Nou

Ich wünsche oi allne es super 2008! Ich hoff, das das Jahr für d uustuuschschüeler under de leserschaft unvergesslich und ganz ganz chulooooooo wird! (Mir hends verdient nach dene blöde erste 3 mönet jeje) Ich hoff, mir chömed ali riif, nöd allzu dick, mehrsprachig, bruunbrennt und mit ganz vil schöne erinnerige us oisem uustuuschjahr zrugg! =)
Ich ha en ganz spanische silvester gha: a mitternacht 12 truube i 12 sekunde i mich inegmurkst (gat nöd, s bliibed mindestens 3 übrig), den macarena und bamboleo tanzet mit minere iaia (grosmami vo da), mine tías und tíos und allne vom camping. Sehr amüsant xi=) nachher bini mit de lourdes no chli go tanze bis am 5i am morge. (ich bi dementsprechend müed)
Also, ich sött go Increíbles go luege mit minere familie, s chunt hüt abig i telecinco (zvil detail ich weiss^^)
Besos, Malin

Feliz Navidad

Liebi Leserschaft (jetz sinds ja meh als 2 lüüt=) )
Fröhlichi wienacht a ali, egal woner grad sind, öbs summer oder winter isch! Die wo dihei, ide schöne schwiiz sind: gnüssed di echte tanneboim, de schnee, euri familie, d tradition, d guetzli=) die wo au grad es uustuuschjahr mached: Gnüsseds au, wel s nächscht jahr simmer wider dihei! "Sisch nöd schlechter, nöd besser, eifach andersch" (afs het scho tolli sprüch).
Ich hoff ier entspannend oi ali guet ide ferie und möged den im januar no durd huustüür trotz de praliné und (i mim fall) em turrón, und das s noie jahr ganz vil schöni sache mit sich bringt! Wünsche allne ganz guets wetter und vil schnee, daser chönd go schiifare (ich ga im januar id pyrenäe, juhuuu!)
Vilicht chunt de iitrag chli früe, aber ich ha nachher kei ziit meh=)
Feliz Navidad, feliz navidad, lalala...
Ganz vil liebi grüess, Malin

Puente

Hola zäme,
es isch grad sunntig abig und ich bi erholt und überfresse vom camping heicho. Ha sitem dunschtig kei schuel gha, mir sind also is camping, und da mer im camping nüt anders macht als spaziere, esse (i gschämigem uusmass) und schlafe (ebefalls i gschämigem uusmass) fühl ich mich grad nöd sehr fit. Mir hend am samschtig geburtstagsfescht vo minere gaschtschwöschter gha, und sisch sehr luut und spanisch gsi... Ich finds amig sehr amüsant. Es isch allgemeinbekannt das Valencianer ales mit brot essed, sich sozsäge us alem es sandwich mached, aber ich ha das wuchenend sache gseh woni nie denkt het dasi das mus erlebe: mini eint gastgrostante het sich iri medikament (!!!!!) ines brot ta, e anderi verwandti het im ernscht de guss vom chueche abkratzt und den als sandwich gässe, etc... Oh ja, und mi tía Maruja het nüssli vom tisch gstole und i iri brusttäsche taa, was au niemer gmerkt het:D Wo sich de samstig den em endi zuegneigt het und ali gnueg whiskey und wii und aigua de valència gha hend het mini gaschtgrosmueter no aagfange öpis moulin rouge-ähnlichs vorztanze, mit sehr vil hüftschwung, und schlussendlich mit em bäbi vom baby aagfange chaschperlitheater zspile (e obszöni version devoo) und churz gseit, ich ha mich nonig erholt. Irgendwenn chömed no föteli.
Jetz hemmer no 2 wuche schuel und ehrlich gseit hani langsam gnueg devo, ich finds am schönschte weni mit de familie cha sii und rede. Ich fang langsam aa, valenciano zrede, ich würs eifach gern mal mit grammatik und so chli richtig zrede, demit ichs bis im summer den cha. Aixinaaaaaa=)
Ich ha allne no wele danke wo mir es päckli gschickt hend, ich bi sehr sehr glücklich wens öpis für mich im briefchaschte het=) (s het amig 5 brief für mich und 2 werbige für mini gaschtfamilie, aber gliich..)
Also, ich sött mis zimmer go uufruume, mini gaschtmueter ischt mer scho mit zimli bluetige drohige cho (te corto el cuello hija mía!)
Besitos!